أهم 18 لحظة رياضية في 2018
حلوة 2018؟ هي أكيد زيها زي أي سنة تانية كانت حلوة في حاجات ووحشة في حاجات، بالنسبة للرياضة ده كان موسم دسم ومليان أحداث في ألعاب مختلفة، الكورة طبعًا هتاخد العين والاهتمام أكتر من أي حاجة تانية، بس لو قررنا نفصص السنة كلها، هنلاقي 18 حدث رياضي مهم حصلوا في 2018 وكانوا متنوعين ما بين كل الألعاب الرياضية، فردية وجماعية.
الصعود لكاس العالم كان في نهاية سنة 2017، بس 2018 هي السنة اللي ناس كتير -لأول مرة- شافت فيها مصر بتلعب في كاس العالم. المشاركة المصرية كانت مخزية، يكفي إني بالأرقام أقولك إن مصر حققت أسوأ نتايج في البطولة كلها على مستوى ال32 فرقة اللي شاركوا. رغم كده فمشاركة مصر في حدث عالمي زي ده بعد غياب سنين، لازم تكون من أهم 18 حدث في السنة، ولاعيبة زي الشناوي ومروان محسن وعبد الله السعيد وعلي جبر.. إلخ، دخلوا التاريخ.
اللي حققه صلاح في 2018، كاستكمال للي حققه في 2017، محتاج قايمة ومجلدات مستقلة، صلاح في 2018 وصل إنه يكون تالت أحسن لاعب في العالم حسب اختيارات فيفا، بقى أول لاعب مصري يلعب نهائي دوري أبطال أوروبا، أول لاعب مصري ياخد جايزة أحسن لاعب في الدوري الإنجليزي، بيختم 2018 وهو بينافس على هداف الدوري الإنجليزي، فريقه أول الدوري الأقوى في العالم بعدد صفر من الهزايم.
الإنجازات اللي حققها صلاح ومتابعة المصريين ليه والفرحة اللي بسببها للناس في كل مكان، تستاهل تكون ضمن أهم الأحداث الرياضية في 2018.
رمضان درويش بطل جودو مصري. الجودو مش من الألعاب اللي بيكون عليها تركيز كبير، اللهم إلا وقت الأوليمبياد لما بيقولوا في لاعب مصري بيلعب فالناس تقعد تتفرج. في 2018 قدر رمضان درويش يحقق ميدالية ذهبية في دورة ألعاب البحر المتوسط بإسبانيا، المميز في الموضوع إن دي تالت ذهبية يحققها رمضان على التوالي في نفس البطولة. رمضان كمان حقق برونزية بطولة العالم في وزن 100 كيلو. سنة مهمة لرمضان درويش.
في 2016 سمعنا أول مرة اسم سارة سمير بشكل كبير، لما قدرت تحقق الميدالية البرونزية في الأوليمبياد، أعظم منافسات رياضية على مستوى العالم. اللي حققته "سارة" في 2016 ماكانش طفرة، و2018 هي الدليل. في 2018 اشتركت سارة في بطولات كتير، أهمها بطولة العالم للشباب، بطولة العالم للكبار، وبطولة ألعاب البحر المتوسط. على مستوى الشباب حققت سارة المركز الأول، والتاني في بطولة الكبار وذهبية البحر المتوسط، عشان تكون بجدارة أسطورة من أساطير اللعبة في مصر، رغم سنها اللي ماتجاوزش 20 سنة.
ولسه مع رفع الأثقال، بس المرة دي رجال. البطل الأوليمبي محمد إيهاب، اللي حقق برونزية أوليمبياد ريو 2016، وذهبية بطولة العالم 2017، بيرجع المرة دي وبيحقق المركز التاني في بطولة العالم بفرق كيلو واحد عن صاحب المركز الأول، بعد ما أخد ذهبية منافسات "الخطف" وبرونزية "النطر". مستنين إيهاب في 2019 وفي أوليمبيات طوكيو 2020.
كرة القدم عندنا مابتحققش ميداليات أوليمبية، دي قاعدة معروفة كده، سواء كرة قدم عادية أو صالات أو شاطئية، بس في أوليمبياد الأرجنتين للشباب كسرنا القاعدة. في 2018 شاركت البعثة المصرية في أوليمبياد الأرجنتين للشباب، وقدر منتخب مصر لكرة الصالات يحقق ميدالية برونزية، عشان تبقى أول ميدالية أوليمبية نحققها في كرة القدم.
ماتش تحديد المركزين التالت والرابع كان ملحمي وده ضاف بعد وطعم مختلف للميدالية، باختصار كنا بنلاعب الأرجنتين صاحبة الأرض وخسرانين 3/1، وهوب في الشوط التاني حولنا الخسارة دي لمكسب 5/4 وجيبنا الميدالية من بوق الأسد.
الفروسية مش حتتنا خالص ومش بتاعتنا، رغم اهتمام العرب بيها من قديم الأزل، عشان كده لما يكون في فارس مصري ضمن الأفضل في العالم، أكيد ده حدث مهم. في 2018، قدر الفارس المصري سامح الدهان يجمع بين لقبي بطولتى الابطال العالمية والجراند سلام للفروسية اللي اتلعبوا فى باريس وأمريكا، ودول بيشارك فيهم أقوى فرسان في العالم، مش أي حاجة يعني.
الإسكواش بالنسبالنا لعبة ملاكي، بنلعب فيها سينجل وباقي البلدان واقفة نيكست ومواهب مصر في الإسكواش مابتخلصش وكل لما حد يعتزل بيطلع غيره. 2018 كان فيها إنجازات كتير لنجومنا في الإسكواش، أهم إنجاز كان فوز فريق السيدات ببطولة العالم ونتيجة الفوز ده كرمهم رئيس الجمهورية بوسام الجمهورية للرياضة من الدرجة الأولى.
منتخب أستراليا سيدات لكرة اليد، شاركوا في 2018 في بطولة الأمم الأسيوية لأول مرة، ورغم إن دي أول مشاركة ليهم، قدروا يحققوا لبمركز الخامس، إنجاز كويس ومهم ويبشر بتقدم أكتر ممكن يحصل بعدين. اللي جايز ماتعرفوش إن المنتخب الأسترالي بتدربه واحدة ست، واحدة ست مصرية تحديدًا. المدربة هي هبة علي، اللاعبة السابقة في الأهلي والزمالك ومنتخب مصر وحاليًا مدربة محترفة وحققت إنجاز مهم في 2018.
فيديو فوز كرم جابر بالميدالية الأوليمبية في أوليمبياد أثينا 2004 واحتفاله مع مدربه، من أكتر الحاجات المبهجة اللي مهما شوفتها مش بزهق منها. نتمنى كرم وإنجازات كرم يتكرروا مع البطل محمد إبراهيم كيشو، اللي قدر في 2018 يحقق بطولة العالم تحت 23 سنة.
آخر مرة حد حقق الإنجاز اللي حققه أحمد، كانت آية مدني سنة 2006. بطلنا المصري أحمد الجندي، قدر في 2018 يجمع بين الفوز ببطولة العالم للناشئين وبطولة العالم للشباب. الخماسي الحديث هي لعبة مركبة عبارة عن 5 مسابقات بيأديهم اللاعب (هي الرماية وسلاح سيف المبارزة والسباحة والفروسية والعدو).
45 ميدالية، ده عدد الميداليات اللي حققتها البعثة المصرية في دورة ألعاب البحر المتوسط بإسبانيا، العدد ده من الميداليات خلى مصر تحتل المركز الخامس في البطولة بين أعلى البلدان اللي حققت ميداليات. الرئيس المصري عبد الفتاح السيسي كرم الأبطال بأوسمة الجمهورية من الدرجة الأولى والتانية والتالتة، حسب المركز اللي حققه اللاعب.
قائمة الأبطال المكرمين:
الجمباز الفني: نانسي طمان - على زهران.
الكاراتيه: أحمد الأصفر - جيانا فاروق - مالك جمعة - أحمد المصري - أريج راشد.
الرماية : أحمد قمر - عفاف الهدهد.
السباحة: فريدة عثمان - عبد الرحمن العربي - مروان القماش - على خلف الله.
رفع الأثقال: أحمد سعد - محمد إيهاب - جابر فرحان - رجب عبد الحى - سارة سمير - مصطفى إبراهيم - هبة أحمد - دينا بركات.
المصارعة: هيثم فهمى محمود - سامى مصطفى - محمد السيد - حسام مرغني - أحمد حسن - سمر حمزة.
الجودو: محمد عبد العال - محمد محيي.
تنس الطاولة: دينا مشرف.
التايكوندو: رضوى رضا.
احنا مش بتوع تنس، احنا بتوع اسكواش، بس في 2018 حصل تطور لطيف ماحصلش من 22 سنة فاتت، لما قدر اللاعب المصري محمد صفوت قدر يوصل للأدوار الرئيسية لبطولة رولان جاروس –واحدة من بطولات الجراند سلام الأربعة الكبرى). بالتوفيق لصفوت في اللي جاي.
لاعب منتخبنا المصري لكرة اليد والمحترف في نادي مونبيليه الفرنسي، محمد ممدوح هشام، قضى سنة سعيدة في 2018، بعد ما قدر يحقق مع فريقه بطولة دوري أبطال أوروبا. وقتها أكتر من مصدر قال إن ممدوح أول لاعب مصري يحقق الإنجاز ده، لكن اللاعب طلع بنفسه رد وقال إنه تالت لاعب بعد والده ممدوح هشام وحسين زكي.
سنة 2010 تم استحداث بطولة جديدة اسمها أوليمبياد الشباب، تتلعب كل 4 سنين زيها زي البطولات الأوليمبية العادية، بطولة 2018 تم تنظيمها في العاصمة الأرجنتينية "بيونس آيرس"، ورغم إن البعثة المصرية كان عددها 68 لاعب ولاعبة بس، إلا إننا قدرنا نجيب 12 ميدالية، 3 دهب و 2 فضة و 7 برونز، من ضمنهم أول ميدالية مصرية في لعبة كرة القدم، ودي أفضل أرقام لينا في أي أوليمبياد. في انتظار اللاعيبة دي في أوليمبياد باريس 2024.
ما لازم يدخلوا موسوعة جينيس، باللي عملوه ده لازم يدخلوا جينيس! الهوكي مش لعبة مشهورة في مصر وتقريبًا ماحدش يعرف عنا حاجة، بس لازم حتى لو ماتعرفش تقف عن إنجاز فريق الشرقية. في 2018 فاز فريق الشرقية ببطولة أفريقيا للهوكي للمرة ال23 في تاريخه، من أصل 28 مشاركة، وال5 مرات اللي فلتوا منهم دول حققوا فيهم الوصافة 3 مرات!
الفريق كمان حقق بطولة الدوري المصري في اللعبة 24 مرة و 8 مرات بطولة كاس مصر، أرقام وإنجازات إعجازية من فريق مالوش أي مساندة إعلامية وفي لعبة مالهاش أي مساندة جماهيرية.
اللاعب باسم أمين، وصل للتصنيف ال35 على مستوى العالم في لعبة الشطرنج، وده أفضل تصنيف وصله أي لاعب مصري أو عربي أو أفريقي، مبروك يا باسم وفي 2019 نشوفك ضمن ال10 الأوائل.
يمكن يكون ده مش حدث رياضي زي ال17 اللي قبله، بس لأسباب زي دي الناس لعبت رياضة وهتفضل تلعب رياضة. ماراثون جري نظمته مستشفى مجدي يعقوب في أسوان، فتقرر طفلة عندها 11 سنة بتبيع مناديل، إنها تشارك في السباق "حافية" والمفاجأة إنها تفوز بيه، لقطات زي دي هي اللي بتخلي الرياضة أكبر من مجرد تنافس على ميداليات وجوايز.
بعد ردود الأفعال على قصة الطفلة مروة، قرر نادي طلائع الجيش الرياضي إنه يتبنى موهبتها ويرعاها، ويمكن في يوم من الأيام نشوفها بطلة مصرية في سباقات ألعاب القوى.د
شكر وتقدير لصفحة وموقع "شبكة أخبار الرياضة المصرية" اللي بيدوروا على أي إنجاز لأي لاعب مصري في أي لعبة في أي مكان، وبيشكلوا دعم إعلامي لألعاب ورياضيين في الظل.
