من كام سنة دخلت إدارة حي المؤسسة في مشكلة مع الأهالي، عشان أطفال الحي كانوا مصممين ينزلوا يعوموا في نافورة الميدان اللي لسه متجددة. أنا ممكن أكون متفهم رفض الحكومة لطلب الأطفال، على اعتبار إن دي نافورة يا حبايبي مش بحيرة البجع. بس ما هو لازم يكون الأطفال دول وحتى الكبار، عندهم مكان ينزلوا فيه المياه بسعر رخيص، أو ملعب يلعبوا فيه كورة، أي حاجة يجروا ويتنططوا ويطلعوا طاقتهم ويفرغوا كبتهم، هما المتحرشين ملوا البلد من شوية يا جماعة.

أنا مشفق عمومًا على الأجيال الجديدة، إكمن مابقاش في شوارع فاضية العيال تلعب فيها، والملاعب غليت، وحمامات السباحة أسعارها ولعت. أنا فاكر زمان، وقت ما كان كاتب السطور دي طفل رفيع وسيم، كنا بنكون محضرين قائمة بأسماء وأماكن الشوارع اللي تصلح إننا نلعب فيها، لو واحد فكس نروح ع التاني، دلوقتي نعمل إيه؟ واللي عاوز ينزل بسين يعمل إيه؟ الليست دي فيها أررخص حمامات سباحة في القاهرة بأسعارها. روح ولو مرة في الشهر، علم ولادك السباحة، خد مراتك مرة كل جمعة، أي حاجة يا أخي.

• نادي العاملين العاملين المدنيين بالقوات المسلحة

مكانه في المنيل، تحديدًا شارع عبد العزيز آل سعود. هتقطعلك تذكرة وأنت داخل وتدفع تذكرة عند حمام السباحة. الموضوع كله هيدخله في 40 جنيه وتقعدلك في حمام السباحة كام ساعة، حسب الميعاد اللي أنت رايح فيه. كمان في هناك مدرسة لتعليم السباحة لأعمار مختلفة. البسين هناك مش وحش بس مش واو ومناسب لكل الأعمار والفئات ورخيص.

المكان غالبًا مش هتلاقيله صور، إكمنه نادي قوات مسلحة وماحدش مستعد يتحاكم عسكري في صورة بسين، بس العنوان سالك ومايتوهش.

• نادي الطالبية

نادي الطالبية في الهرم عامل اشتراكات شهرية لحمامات السباحة. ممكن تدفع 200 جنيه في الشهر بس مش أكتر من كده وتستفيد بحمام السباحة عادي جدًا ومن غير عضوية ولا غيره. النادي كمان فيه أنشطة تانية كتير للأطفال والكبار وممارسة ألعاب مختلفة. الكواليتي ممكن ماتكونش واو لإنه مركز شباب حكومي في النهاية، بس الموضوع ده معمول للناس اللي لازم تخرج وتلعب وتبلبط وتعلم ولادها حاجات جديدة وتخرج مع أسرها خروجات مختلفة، ومش لازم خلاص تكون الخروجة أو النشاط يتدفع فيهم بالدولار ولا حتى مبلغ كبير بالجنيه.

• مركز شباب الجزيرة

لحد الصيف اللي فات كان ممكن تقطع تذكرة ب50 جنيه تدخل بيها مركز شباب الجزيرة وتستفيد من الأنشطة اللي جوه بما فيها حمام السباحة. الأوبشن ده لسه موجود، بس تلاقي ال50 غليت حاجة بسيطة. لو مش معاك 50 جنيه روح مرة كل شهر حتى.

• نادي هيليوبلس

سكان مصر الجديدة مش لازم تيجوا لحد الطالبية ولا الجيزة عشان تلاقوا حمام سباحة رخيص. نادي هيليوبلس فاتح البسين بتاعه لأي حد بمبلغ 75 جنيه مش أكتر. يشترط بس إن يكون معاك عضو عامل. اركن على أي حد دال النادي وقوله دخلني معاك الناس لبعضيها، وادخل اتبسط.

• مدرسة البشاير

البشاير مدرسة خاصة ومدرسة نضيفة في زهراء المعادي، عندهم ملاعب كورة وبسين محترم، وبيعملوا نشاط اجتماعي وبيأجروا البسين والملاعب دي لأي حد عاوز. الساعة مش هتتعدى 100 جنيه والبسين ابن ناس.

• مركز شباب روض الفرج

برضه ممكن تشترك في البسين طول الشهر ب215 جنيه بس للشهر كله والسيدات ب250، مش عارف اشمعنى بس فل، رضا الحمدلله.

• مزاج المعادي

ده مكان كده في المعادي على الكورنيش. مكان خاص تقدر تقضي  فيه يوم كامل زي Dayuse وفي رجالة وستات وكل حاجة. حمام السباحة لوحده، هتقضي فيه اليوم كله ب150 جنيه، بس السعر بيزيد لو قررت تاخد وجبات أو غرف.

• Nile Country Club

ناحية حدائق حلوان على الكورنيش. سعر حمام السباحة 125 جنيه.  وفي غرف لو عاوز تقضي اليوم وفي أنشطة مختلفة في المكان

في أماكن تانية كتير شبه كده، ونوادي القوات المسلحة كلها تقدر كمدني تدفع تذكرة وتدخلها عادي. لو تعرف أماكن تانية في مناطق مختلفة قولنا. لو بقالك كتير نفسك تعمل حاجة مختلفة روح جرب مكان من دول وانزل المياه وسيب نفسك وهي هترفعك