من وقت مش قليل بقى فيه فقرة أساسية في كل برنامج "توك شو" محورها طفل بيخترع حاجة، مابنعرفش كتير عن الاختراع ده ولا بنشوف وزارة البحث العلمي مثلًا مطلعة بيان بخصوصه، بس أهي فقرة من ضمن الفقرات. مؤخرًا بقى ظهر خبر فوز طفل من الأطفال المخترعيين دول بالمركز الأول في جائزة عالمية، بشوية تدوير هتعرف إن لا اسم الولد ولا مصر كلها كانت ضمن الجائزة دي.

الموضوع احتاج إننا نقف شوية ونشوف نوابغ مصر وصلوا لفين، وفي الليست دي جمَّعنا أبرز الاختراعات.

1- عمرو توينج: تحويل لغة الحيوانات للغة بشرية

كانت معجزة سيدنا سليمان إنه يسمع الحيوانات ويتكلم معاهم، ربنا رزقنا في العصر ده بـ "عمرو" مش بس عشان يسمع الحيوانات، لأ وينشر لنا علمه كمان ويصنع آلة تخلينا نقدر نتكلم معاهم.

بالبحث شوية هتلاقي إن "عمرو" بينشر فيديوهات لاختراعاته وأبحاثه العلمية من 2015، بيشرح في الفيديوهات دي ازاي تحول التراب لكهرباء والرمل لمياه.

2- محمد وائل: بيحل مشكلة المرور

"محمد" اخترع طائرة كروكي كده وهو ابن 3 سنين، ولمَّا كبر شوية وكان بيتمشى مع والدته في الشارع وشاف الزحمة، سألها إيه ده؟ قالتله دي الزحمة. فـ روَّح وعمل جهاز يخلّي العربيات تمشي دورين، بحيث واحدة تمشي تحت وواحدة فوق يعني.

وعشان الأم مدرسة، لازم كل أم ماتعملش زي أم "محمد" وتشجع ابنها المخترع من صغره وتسيبه ياخد موتور خلاطها.

3- وليد عبادي: المخترع الأشهر

قصة "وليد" بدأت لمَّا أبوه سجله كل حاجة بيقولها وكل سؤال بيفكر فيه في كراسة صفراء من وهو في عمر 3 سنين، ياريتها ضاعت.

مؤخرًا انتشر خبر إن "وليد" فاز بالمركز الأول من صالون موسكو الدولي للاختراعات وتقنيات الابتكار، المعروف بصالون أرشميدس، في موسكو. لكن بعدها بحث ناس كتير على موقع الجائزة الرسمي، ومالقوش اسم "وليد" ضمن المشاركين. مش بس كده، كمان اللي دوَّر شوية عرف إن المسابقة للكيانات مش للأفراد، والسنة دي مشاركة 70 دولة مش من ضمنهم مصر.

الغريب هو تكريم "وليد" من محافظة البحيرة مجلس جامعة دمنهور.

عشان تعرف تفاصيل أكتر عن الحوار وتحكم بنفسك، اقرأ التفاصيل من هنا.

4- إختراع Midnight: جي بي إس مصري

المعجزة بتطلع من قلب المعاناة، ده اللي حصل لمَّا اتسرق أجزاء من عربية الشاب المخترع، فـ اخترع يومها الفجر الـ جي بي إس المصري. العبقرية بقى إنه أثبت لنا كلنا إننا كنا فاهمين غلط وإن فترة الليل دي معمولة للأوفرثينكنج والمكالمات الساخنة بس، معلوماتنا غلط، والدليل هو إختراع الشاب ده لجاهز GPS مصري الساعة 2 بالليل. 

المشكلة في الآخر إنه ماطلعش GPS وطلع جهاز إنذار على ما قُسم.

5- صلاح هشام: بوتجاز بيشتغل بالمياه

"صلاح" اخترع بوتجاز بيشتغل بالمياه، ممكن يكون صادق، بس بنسبة مش قليلة عشان أبو صلاح نفسه بيقول إن ابنه هو صغير كان بيفك اللعب ويكسرها ويعيد تركيبها، المشكلة إنه بيقول إن ده ماكانش بيضايقه كأب. ده كلام نصدقه؟

6- محمد وائل: حل لطبقة الأوزون

"محمد" سمع في يوم عن مشكلة اسمها مرض السرطان، سأل زي أي طفل في سنه بيكتشف العالم من حوله عن سبب المرض، قالوا له غالبًأ طبقة الأوزون، قال تاهت ولقيناها.

الاختراع جميل مافيش كلام، بس إضافة بُعد طبقي للموضوع زي إن أستاذة جامعية طردته من مكتبها لما عرفت إن أبوه نقاش هيبقى كويس برضه.

7- التكنولوجيا لغة العصر: الهاك فن مش عن عن 

اختراق الحسابات حاجة مش صعبة خصوصًا لو اتفرجت على فيلم "الهرم الرابع"، بس المفاجأة هنا إن المخترع الهاكر الصغير ده وجه طاقته وخصص جهده مخصوص لاختراق صفحات العراق والعراقيين.