من ساعة ما اتعوم الجنيه، والناس بقت بتدور على المنتجات المصري بمنظار، واتعملت حملة كبيرة علشان تشاور على المنتجات دي. وسط إعلانات الحملة، خرج الفويس أوفر بصوت فخيم يقول: 3Brothers بكل فخر صنع في مصر. سيبك من الجنيه، ارجع لورا شوية، ورا لحد زمن الأستاذ توماس إديسون، اللي بدأ حوار إن يبقى في مصدر ضوء غير النار في الكوكب كله. بعد شوية سنين كتير، تحديدًا سنة 1990، في 3 أخوات عملوا  3Brothers، علشان يحطوا تاتش على شغل إديسون، وبعد 26 سنة في السوق، وصلوا لمعرضين في القاهرة: روكسي والمعادي، غير المحافظات زي العاشر من رمضان، إسكندرية والغردقة ، ومصنعين في العاشر، بيصنعوا فيهم الشغل من أوله لآخره، ما هو الراجل ماكانش بيشخط فيك ويقولك "صناعة مصرية" كدة من فراغ.

لو بقالك في السوق 26 سنة، لازم ماتشبعش من النجاح أو ماتكتفيش، تدور دايمًا على الجديد وتحارب علشان تطور نفسك، سمعتك كمكان حلو الناس بتجيب منه أنوار وديكورات، مش هتكفيك لو فضلت واقف محلك سر. طيب هعمل إيه؟ هعمل إعادة افتتاح لأقدم معرض عندي. ده اللي عملوه 3Brothers بالظبط، اتجدد معرض روكسي على إيد  المصممة منى حسين، اتعملت حفلة وحضرها ناس كتير واتكلم فيها "هاني سعد"، مؤسس HSI. ظهرت مجموعة شغل جديدة وديكورات بتصميمات مختلفة، فيهم الشكل والتكنولوجيا هتعمل فرق، وهتلاقي طلبك لو أنت بتدور لبيتك على حاجات بسيطة بس سمارت، وفي نفس غير تقليدية. فلو عندك بيت، مستشفى، شركة، فندق ولا حتى حضانة، روح خدلك فكرة.

أول حاجة لازم تاخد فكرة عنها هي الiComfort وده باين من اسمه إنه بيركز على راحة العين، كهدف مهم لأي حد بيعمل إضاءة، ماتعمليش إضاءة توجع عينيا يا أخي ولا تخليني أحس إني مزغلل، بتضايقني ليه يعني؟ فبقى العدسة الجديدة دي، اخترعها واحد من أكبر مركز أبحاث الإضاءة في النمسا، و 3Brothers هما الوحيدين اللي بيستخدموها في مصر والعالم العربي. النوع ده من الإضاءة لما تشوفه من بعيد، تفتكر الكشاف مطفي، لا هو شغال عادي بس أنت مش عارف. الحاجة التانية هي الإضاءة اللي بتتغير حسب ضوء الشمس وحسب فترات اليوم، يعني فترة الشروق تنور أصفر، الفترة الصباحية تنور أبيض، وهكذا.. تفضل تتغير طول اليوم حسب الشمس والوقت، تقدر تتحكم فيها كمان باستخدام ريموت تاتش باد، أو موبايل أبلكيشن.

كل يوم في حاجة جديدة بتظهر، لو سنة 95 حد قال على الصالون المُدهب "يااااع" كان اتقال عليه مجنون، بس الكنب الفوتيه والعفش المودرن ماكانش لسه أخد فرصته، وماكانش في كل الجاليريز دي ولا الناس اللي بتعمل شغل عمولة من كتالوجات جاية من أوروبا وأسيا. 3Brothers بيعملوا حاجة مصري ومختلفة وبيخلوا النور جزء من لوحة كاملة أو من ديكور البيت، علشان الموضوع أكبر من لمبة.

خد فكرة أكتر عنهم وعن منتجاتهم من الموقع أو من إنستجرام أو من الفيسبوك. 

This article is sponsored.