ست مصرية اسمها أمل، كانت كتبت بوست على فيسبوك إنها مريضة ولوحدها في الإمارات ومحتاجة يبقى في ناس جنبها، في ساعتها، ناس كتير من الجالية المصرية في الإمارات راحولها المستشفى عشان متبقاش لوحدها.

أمل عملت مداخلة تليفونية مع برنامج "آخر النهار"، وقالت إنها محجوزة في الإمارات بسبب قضية تنفيذية ضدها من سنة ٢٠٠٩، أمل كانت بتستثمر في العقارات وخسرت كل فلوسها وعليها ديون ب٤٠٠ ألف درهم بسبب إيجار شقق مغلقة وخدمات تجارية، مش قرض أو شيكات، أضافت أمل، إن السفارة المصرية تواصلت معاها واطمنوا على صحتها وبعتولها ورد على المستشفى، ووعدوها إنهم هيتدخلوا ويتفاوضوا مع الإمارات عشان تقدر ترجع مصر.

الجدير بالذكر إن أمل هتعمل عملية وبتتلقى العلاج مجانًا في الإمارات وبتتعامل معاملة كويسة جداً.