مجلس الشورى السعودي خد خطوة كبيرة نسبيًا وقرر يسمح للستات إنهم يطلعوا فتاوي في الشؤون اللي تخصهم، بالرغم من طبيعة السعودية اللي ممكن تخلي الناس تاخد فكرة إن الفتاوي وشؤون الدين مقتصرة على الرجالة، إلا إن المجلس مؤخرًا سمح للستات اللي درسوا الإسلام والشريعة بعمق، إنهم يطلعوا فتاوي خاصة بيهم وهيبقالهم دور أكبر في الحكم الإسلامي.

في خلال الجلسة ال٤٩ يوم الاتنين، المجلس طالب بوجود دارسين في مجال الإفتاء واللي هيصدروا أحكام في الفقه الإسلامي، وده علشان يسهلوا الطريق قدام الستات إنهم يشاركوا في الحكم. المجلس ناقش وجود الدارسين علشان يبقي في قسم للستات يتعين فيه باحثات مختصات لإصدار فتاوي، رئاسة المجلس طالبت كمان بتعيين أكاديميات سعوديات متخصصات في الدراسات الإسلامية هيبقالهم دور مهم. مساعد المتحدث باسم مجلس الشوري، قال إن طلب المجلس جه بناء على مداخلات من لجنة الشؤون الإسلامية والقضائية.

منظمات حقوق المرأة في السعودية خدت خطوات كبيرة في آخر سنتين، المملكة عدلت مجموعة من القوانين علشان تمكن المرأة، زي إنهم فتحوا الانتخابات المحلية للمرشحات الستات، وخلوا الموافقة الشفهية على الجواز إلزامية. من ٢٠١٣ وتقريبًا على الأقل ٣٠ من أصل ١٥٠ من أعضاء مجلس الشورى ستات، بالرغم من إن الأعضاء لا يتم انتخابهم لكن بيتعينوا عن طريق الملك.