مجلس قرية مدينة الفشن بمحافظة بني سويف، نجح بمساعدة حمار، إنه يقبض على حرامي سرق مخزن الحديد بالوحدة المحلية لقرية إقفهص التابعة للمدينة. اللي حصل إن الحرامي كان راكن العربية الكارو بتاعته وبيسرق مخزن الحديد، ولما لاحظ إن رجالة الوحدة جايين وهيتكشف، ساب الحمار وهرب بسرعة قبل ما يتم القبض عليه. في شخص ذكي طلع منه اقتراح وقال للناس: الحمار ده هو اللي هيقبضلنا على الحرامي.

سابوا الحمار يمشي، واستغلوا ذاكرته القوية اللي هتخليه يرجع لصاحبه تاني، فرجع الحمار لصاحبه بس مارجعش لوحده، كان معاه رجالة الوحدة المحلية وقبضوا على الحرامي واتحرر له محضر رقم 2634 جنح الفشن. الحمار بقى تم التحفظ عليه ونقله لإدارة الطب البيطري في المدينة، صورة الحمار وهو بيتنقل على عربية حمرا ربع نقل، أخدت تعليقات كتير على السوشيال ميديا، قبل ما الحقيقة تظهر ونكتشف إن الحمار ده بطل.