صوت واحد قرر يكون باند بحاله، مش بس كده، ده كمان هيلف العالم يوزع مزيكته. الفنان الأردني يزن صرايرة لعب مزيكا بأشكالها المختلفة لفترات طويلة، لكن بدأ مشروعه الموسيقى في فبراير 2018، قابلناه وسألناه عن تفاصيل مشروعه، وازاي الجمهور بيتقبل إنه شخص لوحده بيكون باند كامل.

إيه نوع المزيكا اللي بتلعبها؟

خليط من الأنواع، فيها بدوي وفيها أندي ميوزيك atmospheric  وهندي بس مش كتير، يعني هي موسيقى مستقلة حرة

يعني أنت بتلعب بشكل حر من غير ما تكون مرتبط بنوع معين واللي عايز يصنف المزيكا دي هو حر؟

بالظبط كده والصوت بتاعي بحاول أدمج فيه الكترونيك ساوند على الجيتار. أنا مش بستخدم أي سوفت وير وكل مزيكتي طالعة من الأنالوج يعني.

طب أغنية "مولاى" فكرتني بالنقشبندي وطوبار هل أنت متأثر بالناس دي؟

الصراحة لأ، مولاى أنا بعرفها من لطفي بوشناق وعملتلها cover، بس أنا متأثر بطريقة الغناء بتاعت لطفي بوشناق بس بطريقتي أنا  وسمعت مرة معمولها ريمكس إلكترونيك، فجمعت عناصر من عندي زي الربع تون والإلكترونيك

في أغاني cover تاني عملتها؟

في أغنية اسمها "انسوني" لعبتها في برنامج  "قاعدة مزيكا"، دي أغنية اسمها Promise ل Ben Howard  بس مسكتها وترجمتها عربي وفي كلمات ما ظبطتش وأنا بترجمها عربي فحطيت كلام من عندي، يعني هو مزج ما بين كلماتي وكلماته ومزج بين أفكاري وأفكاره.

في سؤال تقليدي بقى "أنت دخلت المزيكا ازاي"؟

أخويا الكبير بيعزف عود وأنا كان نفسي في جيتار وأنا عندي 7 سنين وماكانش حد بيجبلي جيتار، فكنت بمسك العود تبع أخويا واعزف لفريق زي Nirvana و Metallica، وأحاول أطلعهم على العود عشان ماعنديش جيتار. شوية شوية شوفت الموسيقى المستقلة، يعني ال alternative music scene (مشهد الموسيقى البديلة) اللي طلع.

بيشرح "يزن": "خلينا أقولك من سنة 2009 في الأردن المشهد الموسيقي اختلف وأنا أصلاً قعدت فترة كبيرة بعزف ميتال مع فرق كتير، يعني العب بيز جيتار مع فريق الجامعة اللي كنت بدرس فيها  software engineering وده مالوش دعوة إني العب مع فريق الجامعة. 

و امتى قررت إنك تكون فريق لوحدك تحت فكرة (one man band)؟

وأنا مع فريق الجامعة كنت بسمع الربع تون، اللي هو صوت غريب بس ده مش بيطلع على الجيتار، اكتشفت ان في quarter note وده مش موجود على الجيتار، فقعدت أدور على آلات فيها "الربع تون" وعزفت "قانون" و "ساز" وقلت لازم أطلع الربع نوت على الجيتار. ساعدني "عدي شواقفة" من فريق المربع، شوفت إنه بيعمل ربع نوت على الجيتار فأخدت منه واتدربت.

و بعدين؟

كان عندي مشاكل مع الفرق، تحديدًا فكرة إن يبقى في باند وإن كل واحد يكون ملتزم وكل واحد يكون على نفس الطريق. وأنا كنت بلعب في كذا فريق، يعني بلعب مع الفريق ده درامز والفريق ده جيتار وبيز جيتار، يعني لعبت كذا آلة موسيقية وكل الفرق دي cover bands، فقررت ألعب لوحدي عشان أنا لو لسه هستنى أعضاء تنضم ليا بنفس الفكر والاهداف والشغف، هقعد استنى للأبد، غير كده اكتشف إني بعرف أعزف كل الآلات وعندي مزيكا كتير براسي، فمش هقعد استنى الناس. 

  وكلماتك بتشتغل عليها ازاي؟

بستخدم كتير بحور الشعر، يعني الrhythm اللي تبع الكلمات بستعمل فيه "فاعلا - فعول -مستفعل "، ده اللي أنا بستخدمه في قوالب الشعر النمطي لما بكتب كلماتي

وإيه اللي جابك مصر

عندي في راسي فكرة إني آجي على مصر والف في مصر على حسابي الشخصي، عشان انشر المزيكا بتاعتي، مش فارقة معايا الفلوس، أنا جيت على دهب الأول مع الاحتفالية Chill O'pposite وقررت أنزل القاهرة والف على الأماكن عشان العب المزيكا بتاعتي.

والحفلات اللي أنت بتلعبها دي مدفوعة؟

اه بس مدفوعة حاجة رمزية كده، وأهم حاجة بالنسبالي إني انشر مزيكتي في مصر، عشان في مصر الناس كتير سميعة بجد والفن فيها قديم.

وهتفضل لحد امتى تصرف على المزيكا؟ أنت عندك كام سنة دلوقتي؟

أنا عندي 28 سنة ومش شغال غير في المزيكا، لما بطلع حفلات في الأردن باخد فلوس ومن الفلوس دي بصرف على المزيكا. مش هشتغل شغلانة 8 ساعات والكلام ده، هفضل اعمل المزيكا بتاعتي وقلة الفلوس الصراحة آخر حاجة تشغل بالي وعارف إن الواحد لازم يكون واقعي، بس فعلا آخر حاجة أفكر فيها الفلوس، لأن الدنيا مش بس فلوس

 الجمهور العربي متوقع إن اللي طالع يلعب مزيكا هو فريق كامل، واحد ماسك جيتار والتاني بيز وحد على الدرامز، لكن في الآخر بيشوفوا إن واحد بس اللي طالع، بيكون رد فعلهم إيه؟

دي حاجة جديدة عليهم ممكن يتقبلوها وممكن لأ، بس الصراحة لما طلعت العب رد فعل الناس كان حلو، يعني ناس كتير حضرت وناس كتير بتيجي تتصور معايا وتقول كلام حلو، أنا ماكنتش متوقع ده، خصوصًا بالسرعة دي، وكل ده وأنا لسه في البداية، لأني ابتديت في فبراير 2018 

فكرة ال delays اللي في الصوت عندك (صدى الصوت) ده بيدي بُعد زي مثلاً أغنية "غيم تموز"

مش غين تموز ولكن أغنية مولاي، كله مبني على ال delays وأنا بستعمل أكتر من delays، يعني ممكن ابدأ الأغنية delay معين وبعد كده يتغير، أنا بعمل كده بآلة حاسبة في البيت، عشان أنا مش بستخدم سوفت وير فـ (صدي الصوت) كله مبني على بعض ((لها حسبة معينة))

 شايف إن مزيكتك تتسمع من فئة معينة؟

 في الآخر أنا بحاول مزيكتي توصل للكبير وللصغير، للعايش بالمناطق الشعبية والأغنيا والفقراء، عشان دي مزيكا مش رايحة لناس معينة، المزيكا اللي عندي بطلعها لكل حد، لكن مين بيتقبل ومين لأ دي حاجة ترجع للمستمع نفسه، إذا كان المستمع نفسه عنده حواجز، ماشي، أصل كلنا عندنا حواجز، بس أنت لما تكون متفتح عقليًا وعندك استعداد تسمع جديد، وقتها ممكن تتقبل المزيكا اللي أنا بلعبها.

شايف إنك لو لعبت بره الوطن العربي هتكون أنجح؟

أنا طموحي أكبر من الوطن العربي وأقدر أروح العب برة، بس لأ، أنا مش عايز ابدأ من برة، عشان الموسيقى بتطلع من بقعة جغرافية معينة وأنا عايز أكون من البقعة دي، أنا أصلي بدوي، فالصوت ده لازم يكون طالع من عندنا من الصحراء ولو الناس اللي برة عايزين يسمعوا المزيكا دي اطلع برة عادي، بس أنا من هنا.